سعدان: سعدان يعني ٻه سعد ستارا، اهي ٻه مشهور ستارا زهره ۽ مشتري آهن. انهن مان مشتريءَ کي سعد الاڪبر (وڏي ڀاڳ وارو) ۽ زهره کي سعد الاصغر چيو وڃي ٿو. ستارن جي علم جي ماهرن موجب جيڪو شخص مشتري ستاري جي ڇانو ۾ پيدا ٿيو هوندو ته اهو شخص حياتيءَ ۾ خوش ۽ خورم هوندو ۽ هو عبادت، خوف خدا، سچائي، زهد ۽ تقويٰ ۾ الڳ حيثيت وارو هوندو. زهره جي باري ۾ چيو وڃي ٿو ته هن ستاري وارو ماڻهو بختاور ۽ زندگيءَ ۾ دنيا جون سموريون خوشيون حاصل ڪرڻ ۾ ڪامياب ٿيندو. سعد جو ضد نحس يعني نحوست يا بدبختي آهي. سعدان جو ضد وري زحل ۽ مريخ ستارا چيا وڃن ٿا.