رگهورام شرما: نامور فنڪار ۽ موسيقار، رگهورام شرما جو جنم 08 فيبروري 1942ع تي حيدرآباد سنڌ ۾ ٿيو. مئٽرڪ تائين تعليم پرائي سگهيو. ورهاڱي سبب خاندان سان گڏ هندستان هليو ويو ۽ الهاس نگر ۾ رهائش اختيار ڪيائين. کيس ننڍپڻ کان ئي ڳائڻ جو شوق هو، اسڪول ۾ پڙهڻ دوران مختلف پروگرامن ۾ حصو ورتائين. بعد ۾ باقاعدہ راڳ جي سکيا ورتائين. رگهورام سنڌي مشھور فلم ”اڃان تہ مان ننڍڙي آهيان“ ۾ ڀڳوتي ناواڻيءَ سان گڏ گيت ڳايا. جيڪي نهايت مقبول ويا. هن سنڌي فلمن کان علاوہ هندي فلمن کي پڻ موسيقي ڏني. هن هندستان جي مشھور موسيقارن ڪلياڻ جي آنند جي ۽ آر. ڊي برمن سان پيانو تي سنگت ڪئي. هن هند، سنڌ کان علاوہ ڪئناڊا، آمريڪا، لنڊن، سائوٿ آفريڪا، هانگ ڪانگ، جاپان ۽ ماريشش وغيرہ ۾ ڳائي نالو ڪمايو. هن ڪيترين ئي هندي فلمن ۾ ڀڄن ڳايا. هڪ هندي فلم ‘سائين بابا’ ۾ سندس چار ڀڄن ڳاتل آهن. هن هندستان ۾ رهڻ دوران ‘شيام نارائڻ’ جي نالي سان سنگيت ڪلب قائم ڪيو. جنهن جو باني ۽ صدر بہ پاڻ هو، جنهن جي پليٽ فارم تي هن ڪيترن ئي فنڪارن کي موسيقيءَ جي سکيا ڏني.
1942.02.08 عيسوي
رگهورام شرما جو جنم 08 فيبروري 1942ع تي حيدرآباد سنڌ ۾ ٿيو.