ڊاڪٽر لکو مل هيرانند هيراننداڻي

لکو مل هيرانند هيراننداڻي، ڊاڪٽر: ھندستان جو پھريون ENT سرجن ۽ ’پدم ڀوشڻ‘ ايوارڊ حاصل ڪندڙ ڊاڪٽر لکومل هيرانند ھيراننداڻي عام معروف ڊاڪٽر ايل. ايڇ. هيراننداڻي 17 سيپٽمبر 1917ع تي ٺٽي شھر ۾ جنم ورتو. ابتدائي ۽ ثانوي تعليم ٺٽي ۽ ڪراچيءَ مان حاصل ڪئي. هن ٺٽي ۾ جمناداس ڪاراڻي جي ڌيءَ سان شادي ڪئي. بمبئي مان MBBS ۽ انگلنڊ مان نَڪ، ڪن ۽ ڳلي (ENT) جي شعبي ۾ ڊگري حاصل ڪري، بمبئي ۾ مستقل رھائش اختيار ڪيائين. 1947ع ۾ بي. واءِ. ايل اسپتال (بمبئي) ۾ ENT سرجن مقرر ٿيو. قائد اعظم محمد علي جناح ۽ بمبئي جو گورنر سَر جان ڪالون به هن کان علاج ڪرائيندا ھئا. 1972ع ۾ سندس ڪوششن سان مٿي ۽ ڳلي جي سرجري لاءِ هڪ ڌار شعبي جو بنياد وڌو ويو، جنھن جو نالو ’ڊاڪٽر هيراننداڻي ڊپارٽمينٽ آف اوٽلرنگالاجي Otolaryngology‘ رکيو ويو. هي پھريون ENT سرجن هو، جنھن کي 1988ع ۾ ’ڌنونتري ايوارڊ‘ سان نوازيو ويو. ان کانسواءِ پنھنجي فيلڊ جو هي پھريون ڊاڪٽر ۽ سنڌي هو، جنھن کي ’آمريڪن سوسائٽي آف نيڪ ائنڊ هيڊ سرجري‘ جو ميمبر چونڊيو ويو. کيس بين الاقوامي اوٽلرنگالاجي فيڊريشن طرفان ’گولڊن ايوارڊ‘ ۽ سارڪ (SAARC) سرجنز طرفان ’ملينئم اي اين ٽي‘ (ENT) جو لقب ڏنو ويو. طبي ميدان کان علاوه سياسي، سماجي ميدان ۾ بھتر خدمتون انجام ڏيڻ ۽ امن قائم ڪرڻ لاءِ به کيس 1993ع ۾ ’مولانا آزاد ايوارڊ‘ سان نوازيو ويو. هن حيدرآباد (سنڌ) سميت هندستان جي ڪيترن علائقن ۾ سماجي ڀلائي ۽ مفت طبي سھولتون فراهم ڪرڻ جا ڪيترا ئي ڪم ڪيا. ڊاڪٽر لکومل 1982ع ڌاري پاڪستان گهمڻ آيو ۽ ٺٽي (سنڌ) ۾ پنھنجي اباڻي گهر جو دورو پڻ ڪيو. پنھنجي شعبي ۾ تمام گهڻي مھارت ۽ شھرت سبب هندستاني حڪومت کيس ’پدم ڀوشڻ‘ ايوارڊ سان نوازيو. سندس سوانح حيات تي پروفيسر ڊاڪٽر سڀادرا آنند جو انگريزي ڪتاب ’Born to Heal‘ ڇپيل آهي. هن 5 سيپٽمبر 2013ع تي بمبئيءَ ۾ ديھانت ڪئي.

داخلا ۾ استعمال ٿيل تاريخون

1917.09.17  عيسوي

ھندستان جو پھريون ENT سرجن ۽ ’پدم ڀوشڻ‘ ايوارڊ حاصل ڪندڙ ڊاڪٽر لکومل هيرانند ھيراننداڻي عام معروف ڊاڪٽر ايل. ايڇ. هيراننداڻي 17 سيپٽمبر 1917ع تي ٺٽي شھر ۾ جنم ورتو.

2013.09.05  عيسوي

ڊاڪٽر لکومل هيرانند ھيراننداڻي 5 سيپٽمبر 2013ع تي بمبئيءَ ۾ ديھانت ڪئي.

شخصيتون - ڀاڱي جون ٻِيون داخلائون