جتوئي، علي بخش، ڊاڪٽر: ناليوارو سرجن علي بخش ولد نبي بخش جتوئي 10 فيبروري 1934ع تي ڳوٺ ٻيٽي جتوئي، تعلقي ميهڙ، ضلعي دادوءَ ۾ پيدا ٿيو. پرائمري تعليم پنھنجي ڳوٺ مان حاصل ڪيائين. مئٽرڪ سال 1954ع ۾ نور محمد هاءِ اسڪول حيدرآباد مان پاس ڪيائين. انٽر سال 1955ع ۾ گورنمينٽ ڪاليج ڦليلي، حيدرآباد مان ۽ ايم. بي. بي. ايس 63-1962ع ۾ ايل. ايم. سي ڄامشوري مان ڪيائين. بعد ۾ ايل. ايم. سي اسپتال ۾ هائوس جاب ڪري 1964ع ۾ ايف آر. سي. ايس ڪرڻ لاءِ انگلنڊ ويو، جتي هن ‘ايڊن برو‘ جي مشھور ڊاڪٽرن سان گڏجي ڪم ڪيو ۽ مختلف تجربا ڪيا. ان دوران هن يورالاجيءَ جي شعبي ۾ مهارت حاصل ڪري ورتي، خاص طور تي پراسسٽيٽ ۾ ڪامياب آپريشن ڪرڻ ۾ پاڻ مڃايائين. اهڙيءَ طرح هن سنڌ ۾ پهريون ڀيرو پراسسٽيٽ جا ڪامياب آپريشن ڪيا. پڙهائيءَ دوران غير نصابي سرگرمين ۾ بہ خوب حصو ورتائين ۽ راندين جھڙوڪ: هيمر ٿرو، ترڻ جي مقابلن وغيرہ ۾ انعام بہ حاصل ڪندو رهيو. جڏهن لياقت ميڊيڪل ڪاليج اسپتال حيدرآباد ۾ ’يورالاجيءَ‘ جو شعبو کليو تہ کيس ان جو انچارج مقرر ڪيو ويو. سندس لکيل ڪتابن ۾ ’ڪلينڪل ميٿڊ ان سرجري‘، ’گائيڊٽو ڪينسر پيشنٽس‘ ۽ ’ڪلينيڪل بڪ ان يورولاجي‘ شامل آهن.
1934.02.10 عيسوي
علي بخش جتوئي 10 فيبروري 1934ع تي ڳوٺ ٻيٽي جتوئي ، تعلقي ميهڙ ، ضلعي دادوءَ ۾ پيدا ٿيو .