سوڍر شاهنواز ڊاڪٽر

شاهنواز سوڍر ،ڊاڪٽر: نامور محقق ۽ لطيف شناسُ ڊاڪٽر شاهنواز ولد در محمد سوڍر، 10 مئي 1940ع تي ڳوٺ ٿاڻي سوڍر (فيض محمد سوڍر)، تعلقي وارھہ، ضلعي قمبر- شھدادڪوٽ ۾ ڄائو. هن ابتدائي تعليم اباڻي ڳوٺ جي مڪتب مان، قرآن شريف ناظره پنھنجي ڏاڏي محمد خان سوڍر وٽ پڙهي پورو ڪيو. اديب سنڌي، مئٽرڪ، انٽر ۽ بي. اي تائين تعليم لاڙڪاڻي مان حاصل ڪيائين. 1963ع ۾ ڳوٺ جي پرائمري اسڪول ۾ استاد مقرر ٿيو. 1969ع ڌاري ايم. اي سنڌي ۽ 1972ع ۾ بي. ايڊ جا امتحان پاس ڪيائين، جنهن کانپوءِ انٽرنيشنل رليشن ۾ پڻ ڊگري ورتائين. 1973ع ۾ ڪميشن پاس ڪري سنڌيءَ جو ليڪچرار مقرر ٿيو، جنهن دوران ٺٽي، لاڙڪاڻي ۽ نئين ديري ڊگري ڪاليجن ۾ ليڪچرار ۽ پروفيسر جي عهدن تي فائز رهيو. سنڌ يونيورسٽيءَ ۾ علامہ غلام مصطفيٰ قاسميءَ جي رهنمائيءَ ۾ ’سنڌي ثقافت ۽ شاھہ عبداللطيف‘ جي عنوان سان هڪ تحقيقي مقالو لکي، 1988ع ۾ ڊاڪٽريٽ جي ڊگري حاصل ڪيائين. سنڌي زبان ۾ لکيل شاھہ عبداللطيف ڀٽائيءَ تي سندس هيءَ پهرين ٿيسز آهي ۽ سنڌ يونيورسٽيءَ ۾ بہ لطيفيات تي پهرين ٿيسز آهي. ڊاڪٽر سوڍر ڪيترو عرصو گورنمينٽ ڊگري ڪاليج لاڙڪاڻي ۾ سنڌيءَ جو پروفيسر ٿي رهيو، آخر ۾ نئين ديري ڊگري ڪاليج مان پرنسپال جي عهدي تان رٽائر ٿيو. ڊاڪٽر شاهنواز سوڍر پنھنجي عمر جو وڏو حصو شاھہ لطيف تي تحقيق ڪندي گذاريو. هن تحقيق کانسواءِ شاعري، ڪهاڻي ۽ ڊراما پڻ لکيا. ڊاڪٽر شاهنواز سوڍر، شاھہ لطيف ڪانفرنس، سچل ادبي ڪانفرنس سميت ٻين ادبي ميڙاڪن ۾ پابنديءَ سان شرڪت ڪندو هو. سندس شروع ۾ ڊرامن طرف بہ ڪافي گهڻو لاڙو رهيو. سندس ٻہ سنڌي ڊراما ’ڏاڏاڻي ڏيھہ ۾‘ (1985ع) ۽ ’نصيب‘ (1986ع) پاڪستان ٽيليويزن تان نشر ٿيا هئا. ڊاڪٽر شاهنواز سوڍر جا هيٺيان ڪتاب شايع ٿي چڪا آهن: (1) شاھہ عبداللطيف ڀٽائي (1990ع)، (2) ثقافت ۽ شاھہ لطيف'>سنڌي ثقافت ۽ شاھہ لطيف (1991ع)، (3) ’اوجاڳي اُجاريا‘ (2000ع). سندس ڪهاڻيون، تحقيقي مضمون مختلف رسالن ۽ اخبارن ۾ شايع ٿيل آهن. سنڌ جي هن عالم ۽ اديب 15 مارچ 2003ع تي وفات ڪئي.

داخلا ۾ استعمال ٿيل تاريخون

1940.05.10  عيسوي

نامور محقق ۽ لطيف شناسُ ڊاڪٽر شاهنواز ولد در محمد سوڍر، 10 مئي 1940ع تي ڳوٺ ٿاڻي سوڍر (فيض محمد سوڍر)، تعلقي وارهه، ضلعي قمبر- شهدادڪوٽ ۾ ڄائو.

2003.03.15  عيسوي

ڊاڪٽر شاهنواز سوڍي 15 مارچ 2003ع تي وفات ڪئي.

اديب - ڀاڱي جون ٻِيون داخلائون