گهگهر نئن: هي نئن ضلعي ملير ۾ ديھه گهگهر ۽ ڌاٻيجي جي دنگ تان وهي سمنڊ ۾ ڇوڙ ڪري ٿي. ڪراچي کان ٺٽي ڏانھن ويندي ڪيتريون نئيون اچن ٿيون، جن مان سسئي پُل کانپوءِ پھرين گهگهر نئن ايندي آهي. هي نئن ڳوٺ مورند وٽ ٻن حصن ۾ ورهائجي ٿي، جن مان هڪ حصي جو نالو وٽيجي ۽ ٻئي حصي جو نالو گهگهر آهي، جيڪي ٻئي نئيون اڳتي وهي وٽيجي وٽ ٻيھر هڪ ٿي سمنڊ ۾ ڇوڙ ڪن ٿيون. گهگهر نئن وارو علائقو جابلو آهي، جتي ماضي ۾ گُهگُهر جا وڻ جام ٿيندا هئا. جنھن ڪري هن علائقي کي گُهگُهر سڏيو ويو، جيڪو نالو بگڙي گهگهر/گگر ٿيو. نئن جي نسبت سان ديھه ۽ يونين ڪائونسل جو نالو به گهگهر آهي. هن نئن تي ڪراچي کان حيدرآباد ۽ اڳتي پنجاب ويندڙ ريلوي پٽڙي کي هڪ وڏي پُل ذريعي گنڍيو ويو آهي. ٺٽي ويندڙ روڊ کي نئن مٿان پُل ڏنل آهي، جيڪا گهگهر ڦاٽڪ جي نالي سان مشھور آهي.