پٺاڻ غلام حسين ڊاڪٽر

پٺاڻ، غلام حسين، ڊاڪٽر: ناميارو اديب ۽ استاد، پروفيسر ڊاڪٽر غلام حسين پٺاڻ، 20 ڊسمبر 1935ع تي، پٺاڻ ڳوٺ، حسين آباد (گدو بندر)، حيدرآباد ۾ ڄائو. هن پهرئين درجي کان چوٿين درجي تائين تعليم، سيد قطب شاھہ گورنمينٽ پرائمري اسڪول، حسين آباد مان حاصل ڪئي. پهرئين انگريزيءَ کان مئٽرڪ تائين ملڪ شيردل خان ميونسپل هاءِ اسڪول ڪوٽڙيءَ ۾ تعليم ورتائين. هن انٽرميڊئيٽ ڊرائنگ جو امتحان 1954ع ۾ فرسٽ ڪلاس ۾ پاس ڪيو. بي. اي 1960ع ۾ سٽي ڪاليج حيدرآباد مان ڪيائين. ان کان اڳ ٽي. ڊي (T.D) جو امتحان سنڌ يونيورسٽي ايجوڪيشن ڊپارٽمينٽ مان 1959ع ۾ پاس ڪيائين. هن ايم. اي سنڌيءَ جو امتحان، سنڌ يونيورسٽيءَ مان 1963ع ۾ فرسٽ ڪلاس، فرسٽ پوزيشن ۾ پاس ڪيو ۽ گولڊ ميڊل حاصل ڪيو. 1977ع ۾ ’سنڌي ناول جي ارتقائي تاريخ‘ تي پي. ايڇ. ڊي ڪيائين. پروفيسر ڊاڪٽر غلام حسين پٺاڻ 1966ع ۾ سنڌ يونيورسٽيءَ جي سنڌي ڊپارٽمينٽ ۾ ليڪچرار ٿيو، 1970ع ۾ اسسٽنٽ پروفيسر، 1984ع ۾ ائسوسيئيٽ پروفيسر ۽ 1985ع ۾ پروفيسر طور ترقي ڪيائين ۽ عمر جا سٺ سال پورا ڪري، 1995ع ۾ رٽائرمينٽ ورتائين. هن پورا 42 سال پڙهڻ ۽ پڙهائڻ ۾ گذاريا. هن ادب ۽ تحقيق تي ڪيترائي مقالا لکيا آهن. پروفيسر ڊاڪٽر غــلام حـسيـن پٺـاڻ جـي ڇـپيــل ڪـتـابــن ۾: (1) ’سنڌي ناول جي ارتقائي تاريخ‘، (2) ’تحقيق جو فن‘، (3) ’شاھہ جي ڪلام ۾ هدايتون‘ شامل آهن، جڏهن تہ سندس ٻہ ڪتاب: (1) ’سماجي سائنس جا تحقيقي اصول‘ ۽ (2) ’ادبي، تاريخي، تحقيق جا اصول‘، سنڌي لئنگئيج اٿارٽي ڇپائي رهي آهي. ڊاڪٽر غلام حسين پٺاڻ کي ’تحقيق جو فن‘ ڪتاب تي، پاڪستان اڪيڊمي آف ليٽرس، 1987ع ۾ انعام ڏنو. ان کانسواءِ کيس ’شاھہ جي ڪلام ۾ تصوف‘ مقالي تي پڻ ڀٽ شاھہ ثقافتي مرڪز پاران 1988ع ۾ انعام ڏنو ويو.

داخلا ۾ استعمال ٿيل تاريخون

1935.12.20  عيسوي

ناميارو اديب ۽ استاد، پروفيسر ڊاڪٽر غلام حسين پٺاڻ، 20 ڊسمبر 1935ع تي، پٺاڻ ڳوٺ، حسين آباد (گدو بندر)، حيدرآباد ۾ ڄائو.

اديب - ڀاڱي جون ٻِيون داخلائون