رخسانه پريت

پريت، رخسانه: نئين ٽهيءَ جي شاعره، رخسانه ’پريت‘ جو پورو نالو رخسانه ڌيءَ محمد صديق چنڙ آهي. سندس والدين نوابشاھہ ۾ رهن ٿا، پر هن جنم ڪاري موري هيرآباد، حيدرآباد ۾، 23 آگسٽ 1967ع تي ورتو، جڏهن سندس والد زبيدہ گرلس ڪاليج ۾ اڪائونٽنٽ هو. سندن اصل ڳوٺ سومر چنڙ تعلقو ڪنڊيارو، ضلعو نوشهروفيروز آهي، رخسانه ابتدائي تعليم گورنمينٽ گرلس پرائمري اسڪول غريب آباد، نوابشاھہ ۽ سيڪنڊري تعليم گورنمينٽ ڊگري ڪاليج نوابشاھہ مان حاصل ڪري پيپلز ميڊيڪل ڪاليج نوابشاھہ مان 1993ع ۾ ايم. بي. بي. ايس ڪئي. پي. ايم. سي هاسپيٽل نوابشاھہ ۾ گائنيءَ ۾ 6 مهينا ۽ لياقت ميڊيڪل ڪاليج ڄامشوري ۾ ميڊيسين ۾ 6 مهينا هائوس جاب ڪيائين. 1998ع ۾ پبلڪ سروس ڪميشن ڪواليفاءِ ڪيائين. فيبروري 2000ع ۾ مشھور قومپرست اڳواڻ ڊاڪٽر دودي مهيريءَ سان سندس شادي ٿي. ڊاڪٽر رخسانه 2000-1999ع ۾ وزيراعظم جي خانداني منصوبه بندي ۽ بنيادي صحت واري پروگرام هيٺ اسسٽنٽ ڊسٽرڪٽ ڪوآرڊينيٽر طور ضلعي نوابشاھہ ۾ ڪم ڪيائين. ان بعد 2000 کان 2002ع تائين ميڊيڪل آفيسر تعلقو ڪوٽڙي رهي. جنهن کان پوءِ ڊسٽرڪٽ گورنمينٽ هاسپيٽل قاسم آباد ۽ دارالامان قاسم آباد ۾ رهي آهي ۽ هن وقت ڊسٽرڪٽ گورنمينٽ اسپتال قاسم آباد ۾ ميڊيڪل آفيسر طور ڪم ڪري رهي آهي.
رخسانه ’پريت‘ 89-1988ع واري دور ۾ نوابشاھہ جي ڪيترن ادبي، سماجي ۽ سياسي پروگرامن جي ڪمپيئرنگ ڪئي، پي. ايم. سي ۾ پڙهڻ دوران لطيف ڏهاڙن تي ڪمپيئرنگ ڪندي هئي. 94-1993ع دوران ريڊيو پاڪستان حيدرآباد تي ادبي پروگرامن جي ڪمپيئرنگ ڪيائين. سندس شاعريءَ جو هڪ ڪتاب ’پياسي ساڀيان جل ٿل خواب‘ (1997ع) ڇپيل آهي، جڏهن تہ ماهوار ’اديب‘ مارچ 2004ع ۾ سندس خاص ڪارنر ’رخسانه پريت ڪارنر‘ بہ ڇپيل آهي. هن وقت سنڌي ادبي سنگت، شاخ حيدرآباد جي جوائنٽ سيڪريٽري ۽ عورتن جي تنظيم WAF (وومين ايڪشن فورم، حيدرآباد) جي ميمبر آهي. پنھنجي ساٿياڻين سان گڏ ڪيترين ادبي ۽ سماجي پروگرامن ۾ سرگرميءَ سان حصو وٺندي رهي ٿي، سندس غزلن جو هڪ مجموعو ڇپائيءَ هيٺ آهي.

داخلا ۾ استعمال ٿيل تاريخون

1967.08.23  عيسوي

رخسانه پريت جوجنم ڪاري موري هيرآباد، حيدرآباد ۾، 23 آگسٽ 1967ع تي ورتو،

شاعر - ڀاڱي جون ٻِيون داخلائون