مولانا گل محمد شهدادڪوٽي : مولانا گل محمد ولد نور محمد 21 رجب 1240ھہ/11 مارچ 1825ع تي ڪنڊي شهر، ڀاڳناڙي، رياست قلات، بلوچستان ۾ جنم ورتو. سندس والد مولانا نور محمد مذهبي علم جو ڄاڻو ۽ علمي اڪابر هو، جنهن قلات جي خان وٽ قاضيءَ جون خدمتون پڻ سرانجام ڏنيون هيون. هيءُ ابتدائي طور تي ڪنڊي شھر ۾ پڙهيو، والد جي شھدادڪوٽ لڏي اچي مقيم ٿيڻ تي پوري خاندان سان گڏ هيءُ بہ شھدادڪوٽ ۾ رهيو ۽ وڌيڪ تعليم اتي پرايائين. هيءُ پنھنجي والد جي تمام ويجهو رهيو، جنهن جي سرپرستيءَ هيٺ تربيت حاصل ڪري عربي سکيو ۽ مذهبي علم تي عبور حاصل ڪيائين. هن خاندان مان مشھور بزرگ علامہ عبدالحليم ڪنڊائي روهڙيءَ وارو پڻ ٿي گذريو آهي. مولانا گل محمد ٻاويهن سالن جي عمر ۾ علم جي تحصيل ڪئي. هن وٽان ڪيترن ئي شاگردن تعليم پرائي ۽ فارغ التحصيل ٿي درس ۽ تدريس جي ميدان ۾ خدمتون سرانجام ڏنائون. هن جي شاگردن مان مولانا عبدالحڪيم (افغانستان)، مولانا محمد حسين (حيدرآباد) ۽ قاضي داد محمد (مڪران) پنھنجي وقت جا صاحب علم بزرگ ۽ معلم ٿي گذريا آهن. پنھنجي والد وانگر هيءُ بہ قادريه سلسلي سان واڳيل هو. نهايت ئي نيڪ سيرت ۽ سچ گو بزرگ هو . مولانا گل محمد عربي ۽ فارسي ٻوليون پڻ چڱي نموني ڄاڻندو هو. فارسيءَ ۾ شاعري بہ ڪيائين. سندس شاعريءَ ۾ رباعيون ملن ٿيون. هن صاحب علم بزرگ ۽ معلم 27 ذوالحج 1306ھہ/ 25 جولاءِ 1889ع تي وفات ڪئي. هن جي مزار شھدادڪوٽ ۾ سندس ئي قائم ڪيل مدرسي جي احاطي ۾ آهي
1825.03.11 عيسوي
مولانا گل محمد ولد نور محمد 21 رجب 1240هه/11 مارچ 1825ع تي ڪنڊي شهر، ڀاڳناڙي، رياست قلات، بلوچستان ۾ جنم ورتو.
1889.07.25 عيسوي
مولانا گل محمد 27 ذوالحج 1306هه/ 25 جولاءِ 1889ع تي وفات ڪئي. هن جي مزار شهدادڪوٽ ۾ سندس ئي قائم ڪيل مدرسي جي احاطي ۾ آهي