پروفيسر لياقت عزيز

لياقت عزيز سولنگي، پروفيسر: پروفيسر لياقت عزيز 9 جولاءِ 1949ع تي ٽنڊي محمد خان ۾ خميسي خان سولنگيءَ جي گهر ۾ پيدا ٿيو. هن سنڌ يونيورسٽيءَ مان پوليٽيڪل سائنس ۾ ايم. اي فرسٽ ڪلاس فرسٽ پوزيشن ۾ پاس ڪئي ۽ ساڳي ئي يونيورسٽيءَ مان وڪالت جي ڊگري پڻ حاصل ڪيائين. 1972ع ۾ ليڪچرر طور پنھنجي عملي زندگيءَ جو آغاز ڪيائين. مختلف هنڌن تي استاد رهڻ کان پوءِ ٽيھن سالن تائين سچل سرمست آرٽس اينڊ ڪامرس ڪاليج، حيدرآباد ۾ تعليمي خدمتون سرانجام ڏنائين.
هُن ٽريڊ يونين سياست جي شروعات فوجي شگر ملز ٽنڊي محمد خان جي مزدور يونين قائم ڪرڻ سان ڪئي. جتي هن شگر ملز ۾ مقامي ماڻهن کي روزگار ڏيارڻ لاءِ ڪوششون ڪيون. ان بعد هن ٽالپر ٽيڪسٽائل ملز ٽنڊو محمد خان، ٻيڙي ورڪرز يونين ۽ ٽانگا ورڪرز يونين جي قيام ۾ پڻ بنيادي ڪردار ادا ڪيو، جيڪي سموريون يونينون پاڪستان ورڪرز فيڊريشن سان سلھاڙيل هيون. جيڪا ڪميونسٽ پارٽيءَ جي پورهيت ونگ هئي. هن پوليٽيڪل سائنس تي 8 تدريسي ڪتاب لکيا. سندس ڪالمن جا ڪتاب ’قومي غدار ۽ حساب ڪتاب‘ (1997ع) ۽ ’ننڌڻڪا گهوڙا‘، ’غيباڻا سوار‘ (2023ع) ڇپجي چڪا آهن. هو پھرين SLA (سنڌ ليڪچرس ائسوسيئيشن) ۽ بعد ۾ سنڌ پروفيسرس ۽ ليڪچرر ايسوسيئيشن (سپلا) جو باني ۽ مرڪزي جنرل سيڪريٽري رهيو. هن 30 سيپٽمبر 2018ع تي ڪراچيءَ جي لياقت نيشنل اسپتال ۾ وفات ڪئي.

داخلا ۾ استعمال ٿيل تاريخون

1949.07.09  عيسوي

پروفيسر لياقت عزيز 9 جولاءِ 1949ع تي ٽنڊي محمد خان ۾ خميسي خان سولنگيءَ جي گهر ۾ پيدا ٿيو.

2018.09.30  عيسوي

پروفيسر لياقت عزيزسولنگي 30 سيپٽمبر 2018ع تي ڪراچيءَ جي لياقت نيشنل اسپتال ۾ وفات ڪئي.

شخصيتون - ڀاڱي جون ٻِيون داخلائون