قريشي (ذات): قريش عربي لفظ تقرش مان ورتل آهي، جنھن جي معنيٰ آهي واپاري (Trader). قريش اصل عرب آهن، قريش خاندان جو بنياد وجهندڙ ’فھر بن مالڪ‘ هو. هي پاڻ سڳورن صلي ﷲ عليہ وآلھ وسلم جن جي آباؤ اجداد مان هو ۽ فھر جو قريش لقب هو، انهيءَ نسبت سان سندس اولاد قريش سڏرائڻ لڳو. جيڪو واپاري هو. محمد بن قاسم جي سنڌ ۾ اچڻ وقت ۽ پوءِ هن قبيلي جا ماڻهو سنڌ ۾ اچي آباد ٿيا ۽ انھن جو اولاد پاڻ کي قريشي سڏائڻ لڳو. پاڻ سڳورا صلي ﷲ عليہ وسلم جن قريشي هئا. قريشي هاشمي بہ انهن مان آهن.
تاريخ ۾ ڄاڻايل آهي تہ هاشمي، سيد، صديقي، عثماني، فاروقي، علوي، عباسي، جعفري ۽ عڪيلي (عقيلي) وغيرہ قريشي آهن. قريشي خاندان جون خاص شاخون آهن: (1) بني غالب، (2) بني لوئي، (3) بني ڪعب، (4) بني مره (بني تميم)، (5) ڪلاب، (6) بني ڪوسي، (7) بني اميه، (8) بني هاشم، (9) بني عباس، (10) دولال ۽ (11) مفتيان. انهن مٿين شاخن مان ڪيترائي خاندان سڄي دنيا ۾ پکڙجي ويا.