فقير ناٿو لُنڊ

فقير ناٿو لُنڊ: فقير ناٿي جو جنم 7 جون 1926ع تي، فقير غلام حسين لُنڊ جي گهر، ڳوٺ شادمان لُنڊ، لڳ شيخاڻي گهاڙي ضلعي بدين ۾ ٿيو. هن پرائمري تعليم سيراڻيءَ مان حاصل ڪئي. تعليم مڪمل ڪرڻ کانپوءِ کيس پوليس کاتي ۾ سپاهيءَ طور نوڪري ملي پر پنھنجي استاد محمد عُرس منڌري پاران منع ڪرڻ تي هِن اهو آرڊر نہ ورتو ۽ سندس ئي چوڻ تي پرائمري استاد مقرر ٿيو. هي يوسف فقير لُنڊ جَتي سَتي جي درگاھہ جو سنڀاليندڙ ۽ گادي نشين رهيو. لطيفيات ۽ تاريخ بابت گهڻي ڄاڻ هيس. سندس اوطاق تي ڊاڪٽر نبي بخش خان بلوچ، محمد ابراهيم جويو ۽ ٻيا ڪيترائي عالم ۽ اديب اچي ڪچھريون ڪندا هئا. هو شاھہ لطيف جو وڏو پارکو ۽ ان جي ڪلام گمام گهڻو ياد هئس. مڃتا طور ثقافت کاتي طرفان کيس ’لطيف ايوارڊ‘ سان پڻ نوازيو ويو. دودي سومري جي قبر، فقير ناٿي ۽ شيخ سومار ڳولي ظاهر ڪئي هئي. 1999ع ۽ 2003ع واري ٻوڏ دؤران هن ايل. بي. او. ڊي جي، جاگرافيائي دليلن سان سخت مخالفت ڪئي، پر سندس مؤقف کي ٻڌو اڻ ٻڌو ڪيو ويو. شاعريءَ ۾ ’احمد خان‘ تخلص ڪم آڻيندو هو. فقير ناٿو لُنڊ وڏي عمر سبب آخري ڏينھن ۾ اکين جي نور کان محروم ٿي ويو هو. هن 28 جولاءِ 2020ع تي وفات ڪئي. کيس يوسف فقير جَتي سَتيءَ واري قبرستان ۾ دفن ڪيو ويو.

داخلا ۾ استعمال ٿيل تاريخون

1926.06.07  عيسوي

فقير ناٿي جو جنم 7 جون 1926ع تي، فقير غلام حسين لُنڊ جي گھر، ڳوٺ شادمان لُنڊ، لڳ شيخاڻي گهاڙي ضلعي بدين ۾ ٿيو.

شخصيتون - ڀاڱي جون ٻِيون داخلائون