عنايت حسين لغاري

عنايت حسين لغاري ڊاڪٽر: ڊاڪٽرعنايت حسين لغاري ولد مولابخش جو جنم 16 جنوري 1967ع تي ڳوٺ دودو خان لغاري، تعلقي ڪوٽ غلام محمد، ضلعي ميرپورخاص ۾ ٿيو. شروعاتي تعليم ڪوٽ غلام محمد مان حاصل ڪرڻ بعد انٽر 1987ع ۾ گورنمينٽ ڊگري ڪاليج ٽنڊو جان محمد، بي. اي 1991ع گورنمينٽ ماڊل ڪاليج ميرپورخاص، ايم. اي (سنڌي) 1994ع ۾ ڪيائين، جنهن دوران ‘عبدالڪريم پليءَ جي شاعريءَ جو جائزو’ جي عنوان سان مقالو (مونوگراف) لکيائين، جنهن جو نگران ڊاڪٽر غلام علي الانا هو ۽ 2004ع ۾ ڪراچي يونيورسٽيءَ مان ‘ٿر جي لوڪ ادب جو تحقيقي ۽ تنقيدي جائزو’ جي موضوع تي ٿيسز لکي پي. ايڇ. ڊي ڪيائين، جنهن جو نگران ڊاڪٽر نواز علي شوق هو. پيشواراڻي زندگيءَ جو آغاز تعليم کاتي ۾ پرائمري استاد طور ڪيائين ۽ ڪميشن جي امتحان تحت اسسٽنٽ پروفيسر طور مقرر ٿيو.هن وقت پاڻ وفاقي اردو يونيورسٽي، عبدالحق ڪئمپس ڪراچيءَ ۾ سنڌي شعبي جي چيئرمئن طور پنهنجون خدمتون سرانجام ڏئي رهيو آهي ۽ سنڌي شعبي جي ٽماهي جرنل ‘ڪارونجهر’ جو ايڊيٽر آهي. پاڻ ان حيثيت ۾ سنڌي ادب جي حوالي سان ڪانفرنسون بہ منعقد ڪرايائين. ڪانفرنسن جي موقعي تي پڙهيل مقالن جو مجموعو پڻ ايڊٽ ڪري ڇپايو اٿس. گذريل ڪيترن ئي سالن کان سندس تحقيقي مقالا ۽ ٻيون لکڻيون سنڌ جي مختلف اخبارن ۽ علمي توڙي ادبي رسالن ۾ مسلسل ڇپجنديون رهيون آهن، جن ۾ روزاني عبرت، ڪاوش، سنڌ، ماهوار نئين زندگي ۽ پندرنهن روزہ عبرت مئگزين وغيرہ شامل آهن. عنايت حسين لغاري اردو روڊ، ڪراچي ۾ رهائش پذير آهي.

داخلا ۾ استعمال ٿيل تاريخون

1967.01.16  عيسوي

ڊاڪٽرعنايت حسين لغاري ولد مولابخش جو جنم 16 جنوري 1967ع تي ڳوٺ دودو خان لغاري، تعلقي ڪوٽ غلام محمد، ضلعي ميرپورخاص ۾ ٿيو.

شخصيتون - ڀاڱي جون ٻِيون داخلائون