اچڪزئي، عبدالصمد خان

عبدالصمد خان اچڪزئي : بلوچستان جي سرحدي علائقي چمن جي اچڪزئي قبيلي سان تعلق رکندڙ مشھور سياستدان، خان عبدالصمد خان انگريز دور ۾ قومي آزاديءَ جي تحريڪ جي هڪ ڪارڪن جي حيثيت سان سياست جي شروعات ڪئي. ڊسمبر 1932ع ۾ آل انڊيا بلوچ ڪانفرنس جي صدارت ڪيائين. 29 جنوري 1934ع تي ڪراچيءَ جي هڪ عام جلسي ۾ تقرير ڪرڻ ۽ اخبارن ۾ مضمون شايع ڪرائڻ جي الزام هيٺ کيس گرفتار ڪري جيل موڪليو ويو. 1937ع ۾ ’انجمن وطن پارٽيءَ‘ جو بنياد وڌائين. ان عرصي دوران هڪ اخبار بہ شايع ڪيائين 1952ع ۾ ’ور ور پشتون‘ نالي پارٽيءَ جو بنياد وڌائين. 1955ع ۾ ون يونٽ جي مخالفت ڪرڻ سبب کيس جيل موڪليو ويو. 1956ع ۾ ’پاڪستان نيشنل پارٽيءَ‘ جي قيام ۾ حصو ورتائين ۽ 1957ع ۾ هن پارٽيءَ جو نالو تبديل ڪري نيشنل عوامي پارٽي (نعپ) رکيو ويو. 1958ع ۾ ايوب خان جي مارشل لا کان پوءِ 10 سالن تائين هو جيل ۾ رهيو. مارچ 1968ع ۾ آزاديءَ کان پوءِ خان عبدالولي خان سان اختلاف جي ڪري ’نعپ‘ کان ڌار ٿي پختونخوا نيشنل عوامي پارٽيءَ جو بنياد رکيائين. هن 1973ع ۾ ڀٽي طرفان ’نعپ‘ ۽ جمعيت جي قائم ڪيل مخلوط حڪومت کي ختم ڪرڻ جي حمايت ڪئي. خان عبدالصمد خان اچڪزئي 2 ڊسمبر 1971ع تي سندس گهر ۾ نامعلوم ماڻهن طرفان رکيل بم ڦاٽڻ سبب شھيد ٿي ويو.

داخلا ۾ استعمال ٿيل تاريخون

1934.01.29  عيسوي

عبدالصمد خان اچڪزئي 29 جنوري 1934ع تي ڪراچيءَ جي هڪ عام جلسي ۾ تقرير ڪرڻ ۽ اخبارن ۾ مضمون شايع ڪرائڻ جي الزام هيٺ کيس گرفتار ڪري جيل موڪليو ويو.

1971.12.02  عيسوي

عبدالصمد خان اچڪزئي 2 ڊسمبر 1971ع تي سندس گهر ۾ نامعلوم ماڻهن طرفان رکيل بم ڦاٽڻ سبب شهيد ٿي ويو.

شخصيتون - ڀاڱي جون ٻِيون داخلائون