سخيراڻي عادل

عادل سخيراڻي : شاعر ۽ سماجي ڪارڪن عادل سخيراڻيءَ جو اصل نالو غلام رسول ولد محمد خان سخيراڻي هو، سندس جنم 10 مارچ 1957ع تي دادو شھر ۾ ٿيو. ابتدائي تعليم دادوءَ ۾ حاصل ڪرڻ بعد مئٽرڪ ڪوٽڙيءَ هاءِ اسڪول مان ڪيائين ۽ انٽر ۽ بي. اي ڪرڻ کان پوءِ 1979ع ۾ ايم. اي جي ڊگري حاصل ڪيائين. عادل سخيراڻي 1974ع ۾ ميونسپل ڪاميٽي دادوءَ ۾ جونئير ڪلارڪ طور ڀرتي ٿيو. ڪجهہ وقت کان پوءِ اتان استعيفا ڏئي سنڌ ايگريڪلچر سپلاءِ آرگنائيزيشن (ساسو) ۾ ڪلارڪ ۽ پوءِ آفيس اسسٽنٽ ٿيو. عادل سخيراڻي ابتدا کان وٺي سياسي، سماجي، ادبي سرگرمين ۾ ڀرپور حصو ورتو. 1986ع کان 1988ع تائين سنڌي ادبي سنگت شاخ دادوءَ جو ٻہ سال سيڪريٽري رهيو. هن ڪيترائي مضمون ۽ مقالا پڻ لکيا، جيڪي مختلف اخبارن، رسالن ۾ ڇپجندا رهيا. سگا شاخ دادوءَ جو جنرل سيڪريٽري بہ رهيو. ان کانسواءِ ايمپلائيز يونين حيدرآباد ڊويزن جو صدر ۽ جنرل سيڪريٽري ۽ مرڪزي چيئرمئن پڻ رهيو. سندس شاعري منظور سخيراڻيءَ سميت ڪيترن ئي نامور فنڪارن ڳائي آهي. عادل سخيراڻي، 23 مارچ 1992ع تي قاتلاڻي حملي ۾ شھيد ٿي ويو. مرڻ پڄاڻان سندس ٻہ ڪتاب: (1) ’نيڻ ٿڪجي پيا‘ (شاعري) ۽ (2) ’سنڌ جون رانديون‘ شايع ٿيا آهن. نامور اديبه ۽ شاعر، بينظير عادل سخيراڻي سندس ڌيءَ آهي.

داخلا ۾ استعمال ٿيل تاريخون

1957.03.10  عيسوي

شاعر ۽ سماجي ڪارڪن عادل سخيراڻيءَ جو اصل نالو غلام رسول ولد محمد خان سخيراڻي هو، سندس جنم 10 مارچ 1957ع تي دادو شهر ۾ ٿيو.

1992.03.23  عيسوي

عادل سخيراڻي، 23 مارچ 1992ع تي قاتلاڻي حملي ۾ شهيد ٿي ويو.

شاعر - ڀاڱي جون ٻِيون داخلائون