صفيه رضي ﷲ عنها (ام المؤمنين): حضور نبي ڪريم صلي ﷲ عليہ وسلم جن جي حرم (گهر واري) پاڪ بي بي صفيه رضي ﷲ عنها جو اصل نالو زينبرضه هو. عرب ۾ غنيمت جي مال مان انهيءَ حصي کي جيڪو بادشاھہ کي ملي، تنهن کي صفيه چون ٿا. بي بي زينبرضه جيئن تہ خيبر جي جنگ ۾ قيد ٿي حضور نبي ڪريم صلي ﷲ عليہ وسلم جن جي حصي ۾ آئي، ان ڪري سندس نالو صفيهرضه پئجي ويو. صفيهرضه جو پيءُ بنو نضير قبيلي جو سردار هو ۽ سندس والدہ قريضه قبيلي جي رئيس سمول جي ڌيءَ هئي، ان جي پيءُ حيي بن اخطب ۽ چاچي مسلمانن خلاف ٿيندڙ گهڻين جنگين ۾ حصو ورتو هو. بي بي صفيهرضه جو پيءُ انهن ماڻهن مان هو، جيڪي خيبر ۾ وڃي آباد ٿيا هئا. خيبر جي فتح کان پوءِ جڏهن هيءَ مسلمانن وٽ قيد ٿي غنيمت جي مال ۾ آئي تہ کيس حضور ڪريم صلي ﷲ عليہ وسلم جن پنھنجي لاءِ پسند فرمايو ۽ 7 هجريءَ ۾ حضرت صفيهرضه جي پاڻ ڪريم صلي ﷲ عليہ وسلم سان شادي ٿي ۽ 10 هجريءَ ۾ پاڻ ڪريم صلي ﷲ عليہ وسلم جن سان گڏ حج ڪيائين. پاڻ ڪريم صلي ﷲ عليہ وسلم جن جي آخري ڏينهن ۾ تمام گهڻي خدمت ڪيائين. حضرت صفيه رضي ﷲ عنها 35 هجريءَ ۾ حضرت عثمان رضي ﷲ عنه جي مٿس گهيري دوران مدد ڪئي. بي بي صفيهرضه جا حضرت بي بي فاطمة الزهريٰ رضي ﷲ عنها سان پڻ تمام سھڻا تعلقات هئا. 50 يا 52 هجريءَ ۾ سٺ سالن جي عمر ۾ سندس وفات ٿي.