صديق سالڪ، برگيڊيئر: اديب، ناول نگار، نقاد ۽ فوجي آفيسر صديق سالڪ 1935ع ۾ منگلير، ضلعي گجرات ۾ ڄائو. هن اسلاميہ ڪاليج لاهور مان انگريزي ادب ۾ ايم.اي ڪئي. بين الاقوامي تعلقات مضمون جي ڊپلوما پنجاب يونيورسٽيءَ مان ڪري ڪجهہ عرصو تدريسي خدمتون انجام ڏنائين. جنهن بعد پاڪ فوج ۾ شامل ٿيو، جتي انٽر سروسز پبلڪ رليشنز جو ڊائريڪٽر مقرر ٿيو. انهيءَ مقرري دوران سندس بدلي اوڀر پاڪستان ۾ ٿي. 1971ع واري جنگ بعد هن ٻہ سال ڀارتي جيل ۾ ڪاٽيا. جيل مان آزاد ٿي وطن واپس آيو تہ کيس آئي.ايس.پي.آر جو ڊائريڪٽر مقرر ڪيو ويو. بعد ۾ ضياءَ الحق جو پريس سيڪريٽري رهيو. ميجر جي عهدي تان ترقي ماڻي برگيڊيئر مقرر ٿيو. 17 آگسٽ 1988ع واري جھاز حادثي ۾ هو ضياءَ الحق سان گڏ اجل جو شڪار ٿيو. صديق سالڪ بھترين ليکڪ هو. سنڌ جي اديب غلام رباني آگري سان دوستي هئس، جنهن پنھنجي ڪتاب ‘جھڙا گل گلاب جا’ ۾ تفصيلي ذڪر ڪيو اٿس. صديق سالڪ جي تصنيفن ۾: (1) ‘مين ني ڍاڪا ڊوبتي ديکا’ سندس انگريزي ڪتاب Witness to Surrender جو اردو ترجمو، (2) ‘همه ياران دوزخ’، (3) ‘تادم تحرير’، (4) ‘پريشر ڪُڪر اور ايمرجنسي’ وغيرہ شامل آهن.