ڊاڪٽراشرف سمون

اشرف سمون، ڊاڪٽر: ڊاڪٽر محمد اشرف سمون، 3 مارچ 1951ع تي تعلقي ٺٽي جي ڳوٺ راڄو نظاماڻيءَ لڳ ”جِهرڪ“ ۾ ڄائو. سندس والد مولوي عبدالله سمون، سنڌ ۾ فقھہ جو برک عالم ٿي گذريو آهي. تعليم جو گهڻو حصو پنھنجي والد کان، عربيءَ جي تعليم مختلف عالمن کان، قرآن پاڪ جو ترجمو ۽ تفسير 1967ع ڌاري مولانا عبيدالله درخواستيءَ وٽ خانپور ڪٽورا ۾ ۽ دوره حديث 1970ع ڌاري مظهرالعلوم کڏي واري مدرسي ۾ پورو ڪري، حديث جي سَندَ حاصل ڪئي. هن 1970ع ۾ دارالعلوم امجديه ڪراچيءَ مان فاضل عربيءَ جو امتحان پاس ڪيو. 1979ع ڌاري ڪراچي يونيورسٽيءَ مان ايم. اي جو امتحان پاس ڪرڻ کانپوءِ 1982ع ۾ گورنمينٽ ڪاليج ڪراچيءَ ۾ ليڪچرر مقرر ٿيو. 1990ع ڌاري علامہ غلام مصطفيٰ قاسميءَ جي رهنمائيءَ ۾ ”ٻارهين صديءَ جي سنڌي محدثن جون خدمتون“ جي عنوان سان مقالو لکي، ڊاڪٽريٽ جي ڊگري حاصل ڪئي. علامہ قاسمي کيس علمي صلاحيتن جي ڪري شاھہ ولي ﷲ اڪيڊمي طرفان ”الشهادت العالميه“ جي سند عطا ڪئي. پاڻ ڪراچي جي ڪامرس ڪاليج ۾ 3 سال پرنسپال ۽ جامعہ ڪراچي ۾ 15 سال وزيٽنگ پروفيسر رهيو. جتي سندس رهنمائي ۾ ڪيترن ئي شاگردن ايم فل ۽ پي ايڇ ڊي ڪئي. ان کانسواءِ يونيسيف طرفان انٽر رليجس ڪائونسل فار هيلٿ، سنڌ جو سيڪريٽري جنرل بہ رهيو. سنڌ يونيورسٽي جي بورڊ آف اسلامڪ اسٽڊيز جو هن وقت بہ ميمبر ۽ پي ايڇ ڊي جي شاگردن جو ممتحن آهي. اسلامي موضوع تي سندس ڪيترائي ڪتاب تصنيف ڪيل آهن. جن ۾: ”پاڻ سڳورن جا خط“ کي وڏي شھرت ملي آهي، جنھن جا ڪيترائي ڇاپا اچي چڪا آهن. ”حيات الانبياء“ (ترجمو) ۽ ”مثنوي قادري“ (ترجمو: 2003ع) پڻ ڇپيل آهن. محمد هاشم ٺٽويءَ جي ٻن عربي تصنيفن ”الوصية الهاشميه“ (ترجمو ۽ حاشيہ: 1995ع) جنھن جو ٻيو ڇاپو رومي فائونڊيشن حيدرآباد پاران 2021ع ۾ شايع ٿيو، ”التحفته المرغوبت في افضليت الدعاءِ بعد المڪتوبت“ جو سنڌي ۾ ترجمو ”سوهڻي سوغات“ جي نالي سان ڪيائين، جنھن جو اردو ترجمو 1995ع ۾ ڇپيو. ان کانسواءِ سندس ڪيترائي ديني، ادبي ۽ تاريخي مضمون ۽ مقالا ملڪ جي ڪيترين ئي سنڌي توڙي اردو اخبارن ۽ رسالن ۾ شايع ٿي چڪا آهن. پاڻ ٽي وي جي مختلف چئنلن تي بحيثيت اينڪر ۽ مقرر جي ڪيترائي پروگرام ڪري چڪو آهي، جڏهن تہ ايران انقلاب ڪانفرنس ۽ ’سيرت ڪانفرنس‘ اسلام آباد سميت ٻين ڪيترن ئي ملڪي توڙي غير ملڪي ڪانفرنسن ۾ پڻ مقالا پيش ڪيا اٿس.

داخلا ۾ استعمال ٿيل تاريخون

1951.03.03  عيسوي

ڊاڪٽر محمد اشرف سمون، 3 مارچ 1951ع ڌاري تعلقي ٺٽي جي ڳوٺ راڄو نظاماڻيءَ لڳ ”جِهرڪ“ ۾ ڄائو

شخصيتون - ڀاڱي جون ٻِيون داخلائون