اداره انسانيت حيدرآباد:

ادارہ انسانيت حيدرآباد: هيءُ ادارو سنڌ جي نامور اديب، صحافي،عالم، دانشور ۽ قومي ڪارڪن محمدعثمان ڏيپلائيءَ سنہ 1952ع ۾ قائم ڪيو.هن اداري کي قائم ڪرڻ جو مقصد ڏيپلائي صاحب هنن لفظن ۾ بيان ڪيو آهي: ”اڄ انسانيت جن پريشانين ۽ تڪليفن مان لنگهي رهي آهي، سا ڪنهن کان بہ ڳجهي ڪانهي. سڀ کان وڌيڪ ڏک ڀري ڳالھہ اها آهي تہ انهن پريشانين ۽ تڪليفن جو ڪارڻ بہ انسان پاڻ ئي آهن ۽ فقط اڻ ڄاڻائيءَ سبب ئي هو پاڻ کي تڪليفون ۽ پريشانيون ڏئي رهيا آهن. دنيا جي دانشورن انهيءَ ڳالھہ کي محسوس ڪري اهڙا ڪتاب لکيا آهن، جن جي پڙهڻ، دل سان هنڊائڻ ۽ عمل ڪرڻ سان انسان ذات تان ڏک ۽ تڪليفون لھي سندن دليون خوشيءَ سان ڀرپور ٿي وڃن ٿيون.“
مٿئين مقصد جي پوئواري ۾ هن اداري طرفان جديد ترقي پسند سوچ جي نمائندگي ڪندڙ عالمي لکڻين کي سنڌيءَ ۾ منتقل ڪرائي شايع ڪيو ويو.اهڙين لکڻين ۾ ”انسان جي تاريخ“ (مصنف: محمد عثمان ڏيپلائي)، ”پيغامِ لطيف“ جا ابتدائي باب (مصنف: جناب جي ايم سيد)،خواجه احمد عباس جو ناول ”چارداڻا“ (مترجم: ابن حيات پنهور)،ڊانويسٽ جوڪتاب ”آمريڪي شاعر“ (مترجم: احسان بدوي)، غلام حيدر ڄامائيءَ جو ڪتاب ”ماڻهو ۽ ڌرتي“، ڪرشن چندر جو ناول ”هاريءَ جي سجاڳي“ (مترجم: عبدالغفور انصاري)، ڪرشن چندر جو ناول”سج ڏکڻ مان ٿو اڀري“ (مترجم: سراج الحق ’بسمل‘)، ڊيل ڪارينگيءَ جو ڪتاب ”راحت ڀري زندگي“ (مترجم: محمد عثمان ڏيپلائي)، ڊاڪٽر صادق جو ڪتاب ”چمڪندڙ زندگي“ (مترجم: محمد عثمان ڏيپلائي) شامل آهن. هيءُ ادارو ڏيپلائي صاحب جي مارشل لا تحت گرفتاريءَ کان پوءِ ختم ٿي ويو.

داخلا ۾ استعمال ٿيل تاريخون

1952.00.00  عيسوي

اداره انسانيت حيدرآباد: هيءُ ادارو سنڌ جي نامور اديب ، صحافي ، عالم ، دانشور ۽ قومي ڪارڪن محمدعثمان ڏيپلائيءَ سنه 1952ع ۾ قائم ڪيو .

ادارا ۽ تنظيمون - ڀاڱي جون ٻِيون داخلائون