ائينيميري شمل

ائينيمري شمل، ڊاڪٽر: جرمنيءَ جي مشھور خاتون مستشرق ائينيمري شمل 07 اپريل 1922ع جرمني جي شھر ارفروت (Efurt) ۾ پيدا ٿي. برلن يونيورسٽيءَ ۾ عربي، فارسي، ترڪي زبانن ۽ اسلامي علوم ۽ فنون جو مطالعو ڪيائين. اوڻٽيهن سالن جي عمر ۾ اسلاميات ۾ ڊاڪٽريٽ ڪيائين. ٻي جنگ عظيم دوران دفتر امور خارجہ ۾ مترجم رهي. 1951ع ۾ پي. ايڇ. ڊي جي ڊگري ورتائين. 1954ع ۾ انقره يونيورسٽي وئي ۽ اتي تاريخ ۽ مذهب جي پروفيسر جي حيثيت سان ڪم ڪيائين. 1961ع ۾ برلن يونيورسٽيءَ ۾ ۽ 1967ع ۾ هارورڊ يونيورسٽيءَ جي شعبي ”مسلم تھذيب“ ۾ پروفيسر رهي. 1965ع ۾ هن جي خدمتن جي اعتراف طور حڪومت پاڪستان طرفان کيس ”ستارہ قائداعظم“ سان نوازيو ويو. 1982ع ۾ حڪومت پنجاب، لاهور جو هڪ خوبصورت روڊ هن جي نالي سان منسوب ڪيو. ڊاڪٽر شمل علامہ اقبال جو خصوصي مطالعو ڪيو آهي ۽ کيس جرمن زبان جي ذريعي يورپ ۾ متعارف ڪرايو آهي، ۽ سنڌي ادب تي بہ متعدد تنقيدي ڪتاب لکي چڪي آهي. سندس هڪ ڪتاب جو سنڌيءَ ۾ ترجمو، پروفيسر ڊاڪٽر حيدر سنڌيءَ، ”سنڌي ادب جي ارتقا“ جي نالي سان ڪيو آهي. شاھہ عبداللطيف ڀٽائيءَ جي رسالي جو ڪجهہ حصو جرمنيءَ ۾ منظوم ترجمو ڪيو اٿس. شاھہ لطيف ۽ تصوف تي کيس اٿارٽي مڃيو ويو آهي. 1983ع ۾ صدر پاڪستان طرفان هن کي ”هلال امتياز“ جو اعزاز ڏنو ويو. ڊاڪٽر شمل صاحبہ پنھنجي وصيت ۾ ڄاڻا يو هو تہ کيس مرڻ کان پوءِ مڪليءَ جي قبرستان ۾ سنڌ جي عظيم دانشور پير حسام الدين شاھہ راشديءَ جي ڀر ۾ دفن ڪيو وڃي. پر ائين ٿي نہ سگهيو، کيس وفات کانپوءِ جرمنيءَ ۾ ئي مٽيءَ ماءُ حوالي ڪيو ويو. البت پير حسام الدين جي مزار وٽ ائنيميري شمل جي علامتي قبر جي تختي لڳائي وئي آهي.ڊاڪٽر ائينيمري شمل 26 جنوري 2003ع تي بون،جرمني ۾ وفات ڪئي.

داخلا ۾ استعمال ٿيل تاريخون

1922.04.07  عيسوي

جرمنيءَ جي مشهور خاتون مستشرق ائينيمري شمل 07 اپريل 1922ع ۾ پيدا ٿي.

2003.01.26  عيسوي

ڊاڪٽر ائينيمري شمل 26 جنوري 2003ع تي بون،جرمني ۾ وفات ڪئي.

شخصيتون - ڀاڱي جون ٻِيون داخلائون