آفتاب نظاماڻي: ڪهاڻيڪار ۽ صحافي آفتاب نظاماڻيءَ جو اصل نالو ’وريام نظاماڻي‘ هو، پر هو ادبي حلقي ۾ ’آفتاب نظاماڻي‘ جي نالي سان مشھور هو. هن 26 اپريل 1948ع تي سانگهڙ شھر ۾ محمد يوسف نظاماڻيءَ جي گهر ۾جنم ورتو. سندس ادب سان تمام گهڻو چاھہ هو. هن صحافت بہ ڪئي تہ اخبارن ۾ ڪالم بہ لکيا. سنڌي ادبي سنگت جو ميمبر بہ رهيو. هو هڪ ئي وقت ڪهاڻيڪار، انشورنس ايجنٽ، صحافي ۽ سماجي ورڪر طور بہ مشھور هو. سندس ڪهاڻين جا ٻہ مجموعا: ”ارپنا“ (1982ع) ۽ ”اوهيرا“، (1984ع) ڇپيل آهن. انگريزن خلاف هليل حُر تحريڪ تي بہ هن وڏي تحقيق ڪري ڪتاب جيترو مواد گڏ ڪيو، پر اُهو ڇپجي نہ سگهيو. ان کان علاوہ سانگهڙ ۾ ثقافتي ميلا لڳرائڻ ۽ سانگهڙ بابت سووينئر ڇپرائڻ ۾ هن جو اهم ڪردار رهيو. سندس لکيل ڪجهہ سنڌي ڊاراما پي ٽي وي تي بہ هليا. لساني فسادن واري دور ۾ کيس 21 جون 1988ع تي حيدرآباد ۾ دهشتگردن شھيد ڪيو. سنجهوري تعلقي جي ڳوٺ عيسن چانڊئي سان تعلق رکندڙ، سندس گاڏيءَ جو ڊرائيور نور محمد سولنگي پڻ اُن واقعي ۾ ساڻس گڏ شھيد ٿيو. سندس آخري آرامگاھ سانگهڙ ۾ ’منصورن جو مقام‘ ۾ آهي. هن وقت سندس فرزند انجم آفتاب نظاماڻي صحافت جي دنيا ۾ سرگرم آهي ۽ پريس ڪلب سانگهڙ جو صدر پڻ رهيو آهي. سندس ٻيو فرزند عدنان آفتاب نظاماڻي مهراڻ يونيورسٽي خيرپور ڪيمپس ۾ انجنيئرنگ شعبي ۾ ڪم ڪري ٿو.
(حوالو: ”سانگهڙ تاريخ جي آئيني ۾“ پروفيسر ممتاز علي لغاري)
1948.04.26 عيسوي
ڪهاڻيڪار ۽ صحافي آفتاب نظاماڻيءَ جو اصل نالو ’وريام نظاماڻي‘ هو، پر هو ادبي حلقي ۾ ’آفتاب نظاماڻي‘ جي نالي سان مشهور هو. هن 26 اپريل 1948ع تي سانگهڙ شهر ۾ محمد يوسف نظاماڻيءَ جي گهر ۾جنم ورتو.