ڇهنڀڙو: ڇهـنڀـڙو، ڳئـون، مينهـن يا ٻڪـريءَ وغيره جي ڦرن کي ڌائڻ کان روڪڻ لاءِ ڪاٺ جي مدد سان ٺاهبو آهي. ڇهنڀڙي جا ٻه قسم ٿيندا آهن. هڪ نمونو: ٻه ڪاٺيون مُني فوٽ جيڏيون، جن مان هر هڪ جو هڪ پاسو چُهنبارو هوندو آهي، هڪ ٻئي مٿان کليل ڪئنچيءَ وانگر رکي، وچ ۾ ڌاڳي سان قابو ڪري، ڪاٺيون ڦَر جي نڪ تي اهڙيءَ طرح رکندا ته جيئن ٻئي چهنبون سامهون بيهن، پوءِ ٻنهن ڪاٺين جي ڇيڙن ۾ ڌاڳا ورائي ڪِياڙيءَ ۾ ٻڌي قابو ڪبا ۽ هڪ ڌاڳي جو وراڪو ڄاڙيءَ جي هيٺيان ڏئي ڇڏيندا آهن. ٻيو نمونو ڪاٺي چپٿري تيار ڪري، بوليءَ وانگر ٺاهي نَڪ ۾ اٽڪائي ڇڏيندا آهن ته جيئن ڦر ڌائڻ جي ڪوشش ڪندو ته ڇهينڀڙي جون تيز چنهنبون اوهَه ۾ لڳنديون ته مال ٽپ ڏيڻ شروع ڪندو آهي ۽ ڦر ڌائي نه سگهندو آهي.