پاٽيو: ڪاٺ جو تَـرُ يا مستطيل تختو، جنهن کي سَانهر (سهاڳو) به چوندا آهن. ٻنيءَ ۾ ٻج جي ڇٽ کان پوءِ ڏاندن جي ڳچيءَ ۾ پاڃاري وجهي، ان سان هڪ اڻ گھڙيو ڪاٺ جو چوڪور ٽڪر ٻڌبو آهي. جنهن جي پويان ٻوڙا يا ٽاريون ٻڌبيون آهن ۽ اڳيان ڏاند ان کي گھيلندا آهن. پاٽيي جي گھمائڻ سان هڪ ته ٻج زمين ۾ پورجي ويندا آهن ۽ جھار کان بچي ويندا آهن. ٻيو ته زمين به سنوت ۾ ايندي آهي. اڄڪلهه پاٽيي يا سانهر جو نمونو جنهن ۾ گول پيپ مٿان انگوڙي مثل ڇلا، دُريءَ جي لڳو لڳ ٿين ٿا. هي عام طور تي تراکڙي ليٽڻ (Flat-Roll) کان ڳرو ٿيندو آهي، ڀترن ڀڃڻ لاءِ ٽاريون يا ٻوڙا نه ٻڌبا آهن. هن کي ويڙهي ليٽڻ (Ring Roll) پڻ سڏيو ويندو آهي.