چغدو، حاجي شير محمد ’شيرل‘: نامياري شاعر ۽ نثر نويس حاجي شير محمد ’شيرل‘ ولد محمد صالح چغدي، 9 نومبر 1880ع ڌاري شڪارپور ۾ جنم ورتو. سندس وڏا اصل ديري غازي خان جا رهواسي هئا، جتان لڏي اچي پهريائين خيرپور ميرس ۾ رهيا ۽ بعد ۾ شڪارپور ۾ آباد ٿيا. سندس والد قابل استاد هو. جنهن 1906ع ۾ رٽائر ڪيو. هن ابتدائي تعليم ورنيڪيولر اسڪول نمبر 2 شڪارپور مان حاصل ڪري، فائنل جو امتحان ورنيڪيولر اسڪول نمبر 01 مان پاس ڪيو. ان کان پوءِ ٽريننگ ڪاليج فار مين حيدرآباد ۾ ٽريننگ ورتائين. ٽريننگ وٺي واپس شڪارپور آيو، جتي مختلف اسڪولن ۾ پڙهايائين. جون 1929ع کان مسلم اسڪولن جو انسپيڪٽر رهيو ۽ ان ئي عهدي تان 24 سيپٽمبر 1932ع تي رٽائر ڪيائين. کيس شاعريءَ ڏانهن لاڙو ٽريننگ ڪاليج ۾ تربيت حاصل ڪرڻ دوران ٿيو ۽ پنهنجي استاد قاضي اميد عليءَ جي رهنمائيءَ ۾ شعر لکندو هو. اڳتي هلي هن مولانا عبدالغفور همايونيءَ جي صحبت ۽ پوئلڳي اختيار ڪئي. هن شاعريءَ کان سواءِ نثر به لکيو. سندس هيٺيان ڪتاب شايع ٿيل آهن: (1) ’دل خندان‘، (2) ’عمرمارئي‘، (3) ’پهريون بشر‘ ۽ (4) ’سيدالانبياءِ‘، جڏهن ته سندس اڻڇپيل ڪتابن ۾: (1) ’صـداقـت الـقـرآن‘، (2) ’صـداقت الرسول‘، (3) ’سياست فاروقي‘، (4) ’غزوه بدر‘ ۽ (5) ’اخلاقي مضمون‘ ۽ سندس ڪلام جا ٻه دفتر ’ڪليات شيرل‘ ۽ ’ديوان شيرل‘ شامل آهن.
هن 14 آڪٽوبر 1963ع تي وفات ڪئي.
1880.11.09 عيسوي
نامياري شاعر ۽ نثر نويس حاجي شير محمد ’شيرل‘ ولد محمد صالح چغدي، 9 نومبر 1880ع ڌاري شڪارپور ۾ جنم ورتو.
1963.10.14 عيسوي
هن 14 آڪٽوبر 1963ع تي وفات ڪئي