داخلا جي تاريخ 2012-12-20
داخلا نمبر 4802
عنوان ڀٽين جي جامع مسجد جو مدرسو
شاخ درسگاهه
پڙهيو ويو 104 ڀيرا
داخلا جو حوالو انسائيڪلوپيڊيا سنڌيانا جلد ٻيو

ڀٽين جي جامع مسجد جو مدرسو

ڀٽين جي جامع مسجد جو مدرسو: ٺٽي جو مخدوم اسحاق ، شيخ بهاءُ الدين زڪريا جو مريد هو. فضيلت ۽ ڪماليت ۾ بينظير هو. ٺٽي ۾ پنهنجي محلي ۾ موجود جامع مسجد ۾ مدرسو قائم ڪيائين، جتي قرآن، حديث ۽ فقہ جي عام تعليم ڏيندو هو. سندس ٻه صاحبزادا مخدوم احمد ۽ محمد پڻ انهيءَ ساڳي ئي مدرسي ۾ پڙهيا. مخدوم محمد ڀٽيءَ ظاهري علمن جي تحصيل پنهنجي والد بزرگ کان پرائي ۽ پنهنجي پيءُ وانگر انهيءَ ساڳئي مدرسي ۾ درس تدريس جو شغل قائم رکيائين. مخدوم محمد باطني علمن جي صفائيءَ ۾ ڏاڍي ڪوشش ڪئي، پر ظاهري شرع جي مخالفت سهي ڪين سگهندو هو. مخدوم احمد به وڏو ولي ۽ بزرگ عالم هو، هميشه گوشه گمناميءَ ۾ گذاريندو ۽ الله تعاليٰ جي ذڪر ۽ فڪر ۾ محو رهندو هو. سندس ان مجاهدي جي ڪري وقت جو حاڪم ڄام نظام الدين به سندس عقيدتمند ٿي رهيو. مخدوم احمد پنهنجي ڀاءُ مخدوم محمد کي ساڳئي مدرسي ۾ قرآن، حديث ۽ فقہ جي پڙهائڻ ۾ مدد ڪندو هو. اهو سلسلو سندن پوين تائين قائم رهيو. سندس بزرگن جي اولاد مان وڏا وڏا عالم، عارف، فاضل، اديب، شاعر، خدا جا نيڪ ٻانها ۽ ڪرامت جا صاحب ٿي گذريا آهن.


هن صفحي کي شيئر ڪريو