داخلا نمبر 661
عنوان ٻٽ سرائي
شاخ قبيلا ۽ ذاتيون
پڙهيو ويو 464 ڀيرا
داخلا جو حوالو انسائيڪلوپيڊيا سنڌيانا جلد پهريون

ٻٽ سرائي

ٻٽ سرائي/ ٻٽ: ھڪ ذات جو نالو آھي ۽ ”سرائي‘ ان قبيلي جي چڱي مڙس جو لقب آھي، جيئن ته ھن ڳوٺ ۾ پھريان ”ٻٽ“ اچي آباد ٿيا، تنھنڪري سندن ئي نالي پٺيان ھن ڳوٺ تي ”ٻٽ سرائي“ نالو پيو، ان کان پوءِ ”اسراڻ“ قبيلو اچي آباد ٿيو، جن ”نئين ديري“ واري علائقي مان ”راشدي“ پيرن کي ھتي آڻي آباد ڪيو. ابتدائي طرح ”راشدين“ مان وڏو پير سائين محمد پناهه شاهه، ”پير پنھل“ حضرت روضي ڌڻي محمد راشد جن جو ڀائٽيو ۽ نياڻو ھو، جيڪو پنھنجي گھر ٻار سميت اچي ھتي رھيو ۽ ھن وقت به سندس مزار اتي ئي آھي، ان وقت پيرن سان گڏ سندن خدمتگار به آيا، جيڪي پاڻ کي خاصخيلي سڏائڻ لڳا، بعد ۾ ٻين به ڪيترين ذاتين جا ماڻھو ھتي اچي آباد ٿيا، جن ۾ شيخ، پتافي، پنھور، ساند ۽ سومرا وغيره شامل آھن. ھندو به ھتي رھندا ھئا، اھڙيءَ طرح مختلف ھنرمند، جھڙوڪ ڪنڀر، ڊکڻ، حجم، ميراثي، لورا ۽ ڌوٻي وغيره به مختلف ھنڌن تان لڏي اچي، ھن ڳوٺ ۾ آباد ٿيا. ٻن ديھن ”ٻٽ سرائي“ ۽ ”ڪيرڙي“ تي مشتمل ٻٽ سرائي ڳوٺ تعليم جو به مرڪز رھيو آھي، ھتي قديم زماني کان ھڪ ديني مدرسو ۽ انگريزن جي زماني کان وٺي ھڪ گورنمينٽ پرائمري اسڪول پڻ قائم ٿيل آھي، جتي اڳ سنڌي ستن درجن تائين تعليم ڏني ويندي ھئي، انھيءَ اسڪول مان فارغ ٿيل ڪيترائي شاگرد وڏن عھدن تائين پھتا. جھڙوڪ: سپرنٽينڊنٽ انجنيئر، چيف انجنيئر، صوبائي سيڪريٽري، ڊپٽي ڪليڪٽر، ايڊيوڪيشنل ڊائريڪٽر، استاد، مختيارڪار، اسيمبلي ميمبر ۽ سنڌ جي وزيراعليٰ جا صلاحڪار وغيره شامل آھن. صوبائي اسيمبلي جو اڳوڻو ميمبر منور علي ٻٽ ۽ مشھور اسڪالر ڊاڪٽر الھرکيو ٻٽ به ھن ڳوٺ جا رھاڪو آھن. ھن وقت ڳوٺ ۾ گورنمينٽ گرلز اسڪول، گرلز ووڪئشنل اسڪول ۽ گورنمينٽ ھاءِ اسڪول پڻ قائم آھن، جن مان ھر سال ڪيترائي شاگرد فارغ التحصيل ٿيندا رھن ٿا. ھن ڳوٺ جي پسگردائيءَ ۾ ڪيترائي ننڍا وڏا ڳوٺ پڻ موجود آھن جن ۾ جھتيال، ڳن، مگسين، کوسن ۽ چانڊين جا ڳوٺ شامل آھن. جتان جا ٻار، ڳوٺ ٻٽ سرائيءَ مان تعليم حاصل ڪندا آھن. ٻٽ سرائي يونين ڪائونسل به آھي. پڪي روڊ ذريعي ميھڙ ۽ راڌڻ شھرن سان ڳنڍيل آھي. ڳوٺ ۾ بجلي به موجود آھي. اٽي پيھڻ جون چڪيون ۽ سارين جو وڏو ڪارخانو به موجود آھي .


هن صفحي کي شيئر ڪريو

هن داخلا لاءِ تاريخ جا حوالا موجود نه آهن

قبيلا ۽ ذاتيون - ڀاڱي جون ٻِيون داخلائون

باٺا
باپراڻي
باجاري
باجائِي
باجر
باجڪاڻي
باڇڪاڻي
باخلاڻي
بادا
بادِيا2
قبيلا ۽ ذاتيون ڀاڱي جا وڌيڪ مضمون