داخلا نمبر 4183
عنوان بيورو آف ڪريڪيولم اينڊ ايڪسٽينشن وِنگ سنڌ
شاخ حڪومتي ادارا
پڙهيو ويو 176 ڀيرا
داخلا جو حوالو انسائيڪلوپيڊيا سنڌيانا پهرين جلد جو ضميمو
بيورو آف ڪريڪيولم اينڊ ايڪسٽينشن ونگ، سنڌ

بيورو آف ڪريڪيولم اينڊ ايڪسٽينشن ونگ، سنڌ

بيورو آف ڪريڪيولم اينڊ ايڪسٽينشن وِنگ سنڌ

بيورو آف ڪريڪيولم اينڊ ايڪسٽينشن وِنگ، سنڌ: ڄام شوري ۾ قائم بيورو آف ڪريڪيولم اينڊ ايڪسٽينشن ونگ، سنڌ جي تعليم ۽ خواندگي کاتي سان لاڳاپيل اهم ادارو آهي. پهرين جون 1970ع تي ’ڊائريڪٽوريٽ آف ايڊيوڪيشن اينڊ ايڪسٽينشن ۽ اسپيشلائيزڊ سروسز‘ جي نالي سان هن اداري جو قيام عمل ۾ آيو، جنهن جي بنيادي ڪمن ۾ صوبي ۾ ملازمت ڪندڙ استادن جي تربيت ڪرڻ ۽ خاص ٻارن جي اسڪولن جي سارسنڀال لهڻ هو.
1972ع جي تعليمي پاليسي جي روشنيءَ ۾ وفاقي نصاب جو ادارو ٺهيو ۽ صوبن اندر پڻ نصاب جا ادارا ٺاهيا ويا. 1 نومبر 1972ع ۾ سنڌ ۾ هن اداري جو نالو تبديل ڪري ’بيورو آف ڪريڪيولم اينڊ ايڪسٽينشن ونگ سنڌ، ڄامشورو‘ رکيو ويو. 1976ع ۾ سنڌ جي استادن ۾ تربيت ادارن جو انتظامي ڪنٽرول بيورو آف ڪريڪيولم جي حوالي ڪيو ويو. ته جيئن نصاب ۽ تربيت جو ڪم بهتر نموني سان هلي سگهي. 1978ع ۾ بيورو آف ڪريڪيولم کي سنڌ جي تعليم کاتي جو ’لاڳاپيل ادارو‘ پڌرو ڪيو ويو. 1988ع ۾ هن اداري کي تعليم کاتي جي تحقيقي اداري جو درجو پڻ ڏنو ويو. 2005ع ۾ ڪراچي ۽ سکر ۾ قائم ڪيل ٽن ’ڪالجز آف ايجوڪيشن‘ جو انتظامي ڪنٽرول پڻ هن اداري جي حوالي ڪيو ويو. هن وقت بيورو آف ڪريڪيولم ۾ انتظامي نگرانيءَ هيٺ استادن جي تربيت جا 25 اپلينسٽري ڪاليجز آف ايجوڪيشن (14 مرد، ۽ 11 عورت) ۽ 3 ڪاليج آهن. سنڌ جي مختلف ضلعن ۾ پي. ٽي. سي، سي. ٽي، او. ٽي. سي، اَي. ٽي. سي ۽ بي. ايڊ جا ڪورس ڪرائي رهيا آهن.
هن اداري جي بنيادي مقصدن ۾ نصاب جي تياري ۽ نظرثاني، استادن جي جديد انداز ۾ تربيت، تعليمي تحقيق ۽ شاگردن جي حاصلات جو جائزو وٺڻ شامل آهي. هن ادري جي بنياد وجھڻ ۽ اداري جي ترقيءَ ۽ واڌ ويجهه ۾ سيد پناهه علي شاهه، آپا شمس عباسي، مشتاق احمد کوکر، محمد ابراهيم جويي، غلام رضا ڀٽي ۽ ٻين ڪيترن ئي سنڌ جي ناميارن شخصيتن جو ڪردار رهيو آهي. هي ادارو نصاب سازي، استادن جا رهبر تيار ڪرڻ، تربيتي مينيوئل ۽ ٻيو ڪيتروئي درسي ۽ تعليم مواد ۽ سامان تيار ڪندو رهيو آهي. جنهن سان صوبي جي تعليمي معيار کي بلند ڪرڻ ۾ مدد ملي آهي. هن اداري جي ڊائريڪٽرن ۾ سيد پناهه علي شاهه، واحد بخش شيخ، غلام رضا ڀٽو، آپا شمس عباسي، مشتاق احمد کوکر، بقا محمد قريشي، محمد صالح گوپانگ، نظام الدين ميمڻ، ڊاڪٽر حبيب الله صديقي، عبدالحميد ميمڻ، محمد شريف ميمڻ، مسز صغريٰ شيخ، ڊاڪٽر صاحب خان چنا، ڊاڪٽر محبوب علي شيخ، مشتاق احمد شاهاڻي ۽ پروفيسر خير محمد زرداري شامل آهن.
هن اداري ۾ بنيادي تعليمي ڪم جيڪي ماهر مضمون ڪم ڪندا رهيا آهن، انهن ۾ محمد ابراهيم جويو، ڊاڪٽر الهداد ٻوهيو، عبدالمجيد عباسي، ڊاڪٽر ابوالقاسم شيخ، لعل بخش کوکر، قاضي غلام اڪبر، صفدر مرزا، اقبال ملڪ، طلعت جسڪاڻي، زاهده حُميراڻي، مريد شريف ڪلهوڙو، ڊاڪٽر محمد ميمڻ، رانجھو خان زرداري، نسرين جعفري، مسرت حسين رضوي، صغير احمد شيخ، انوار احمد زئي، غلام اصغر ميمڻ، ادريس جتوئي، عبدالمجيد ڀرٽ ۽ ٻيا شامل آهن.


هن صفحي کي شيئر ڪريو